ଝାରସୁଗୁଡ଼ା, 21.01.24 ( ପ୍ରତ୍ୟୁଷା ବ୍ୟୁରୋ ): ଝାରସୁଗୁଡ଼ାରେ ଅନୁଷ୍ଠିତ ହୋଇଯାଇଛି ତିନି ଦିନିଆ ସିଆଇଆଇ ଏଣ୍ଟରପ୍ରାଇଜ ଓଡ଼ିଶା ୨୦୨୪ । ୧୯ରୁ ୨୧ ଜାନୁଆରି ପର୍ଯ୍ୟନ୍ତ ଅନୁଷ୍ଠିତ ଏହି କାର୍ଯ୍ୟକ୍ରମରେ ପ୍ରାୟ ୧୦୦୦ରୁ ଅଧିକ ଅଂଶଗ୍ରହଣକାରୀ, ୧୫୦ ଏଗଜିଭିଟର ଏବଂ ୫୪ ଜଣ ଶିଳ୍ପ ଅଂଶୀଦାର ଏବଂ ଶିଳ୍ପ ସଂଘ ଅଂଶଗ୍ରହଣ କରିଥିଲେ। ଏଥିରେ ଅଷ୍ଟ୍ରେଲିଆ, ବାଂଲାଦେଶ, ନେପାଳ ଓ ମିଆଁମାରର ପ୍ରତିନିଧି ଦଳ ଓ କୂଟନୀତିଜ୍ଞଙ୍କ ସମେତ ଓଡ଼ିଶା ତଥା ଦେଶର ଶିଳ୍ପ ପତିଙ୍କ ସମେତ ଓଡ଼ିଶା ବାହାରୁ ୫୮ଟି କମ୍ପାନି ଅଂଶଗ୍ରହଣ କରିଥିଲେ। କାର୍ଯ୍ଯକ୍ରମର ପ୍ରଥମ ଦିବସରେ ମହତ୍ୱକାଂକ୍ଷୀ କାର୍ଯ୍ୟକ୍ରମ ଅନ୍ତର୍ଗତ ଓଡ଼ିଶା ସରକାରଙ୍କ ସହିତ ୨୩,୩୮୯.୪୩ କୋଟି ଟଙ୍କା ପୁଞ୍ଜିିନିବେଶ ପ୍ରତିଶ୍ରୁତି ଥିବା ୧୧ଟି ବୁଝାମଣାପତ୍ର (ଏମ୍ଓୟୁ) ସ୍ୱାକ୍ଷରିତ ହୋଇଛି । ପ୍ରକଳ୍ପଗୁଡ଼ିକ କାର୍ଯ୍ୟକାରୀ ହେଲେ ରାଜ୍ୟରେ ୧୫,୧୬୮ ଜଣ ଲୋକଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି ହେବ । ଦିତୀୟ ଦିନରେ ବିଭିନ୍ନ ସେମିନାର ଏବଂ ଆଲୋଚନା ଚକ୍ର ମାଧ୍ୟମରେ ସାରଗର୍ଭକ ଆଲୋଚନା ହୋଇଥିଲା ଯେଉଁଥିରେ ଓଡ଼ିଶା କିଭଳି ଆହୁରି ସମୃଦ୍ଧ ହୋଇପାରିବ ଏବଂ ବିଭିନ୍ନ କ୍ଷେତ୍ର କିଭଳି ବିକାଶ ପ୍ରକ୍ରିୟାରେ ଉନ୍ନତ ଯୋଗଦାନ ଦେଇପାରିବେ ତାହା ଉପରେ ବକ୍ତା ଓ ବିଶେଷଜ୍ଞମାନେ ଆଲୋଚନା କରିଥିଲେ । ଓଡ଼ିଶାରେ ରହିଥିବା ବିପୁଳ ସମ୍ଭାବନାକୁ କିଭଳି ଅର୍ଥନୈତିକ ଅଭିବୃଦ୍ଧିକୁ ତ୍ୱରାନ୍ୱିତ କରିବା ଲାଗି ବ୍ୟବହାର କରାଯାଇପାରିବ ତାହା ଉପରେ ଏହି ଆଲୋଚନାଗୁଡ଼ିକ କେନ୍ଦ୍ରୀତ ଥିଲା । ସେହି ଅଧିବେଶନଗୁଡ଼ିକରେ ଶିଳ୍ପ ବିଭାଗର ପ୍ରମୁଖ ସଚିବ ହେମନ୍ତ ଶର୍ମା, ଇପିକଲ୍ ଓ ଇଡ୍କୋ ଏମ୍ଡି ଭୂପେନ୍ଦ୍ର ସିଂହ ପୁନିଆ ଏବଂ ବିଭିନ୍ନ ଜିଲ୍ଲାର ଜିଲ୍ଳାପାଳ ଓ ଅନ୍ୟ ବିଶିଷ୍ଟ ବକ୍ତାମାନେ ଅଂଶଗ୍ରହଣ କରିଥିଲେ । ଏହାବାଦ କୃଷି ଓ ଖାଦ୍ୟ ପ୍ରକ୍ରିୟାକରଣରେ ସୁଯୋଗ ସମ୍ପର୍କିତ ଅଧିବେଶନରେ ବକ୍ତାମାନେ ଚାଷୀ ଓ କୃଷି ଉଦ୍ୟୋଗୀଙ୍କ ପାଇଁ ରହିଥିବା ସୁଯୋଗ ଉପରେ ଆଲୋକପାତ କରିଥିଲେ
। ରାଜ୍ୟର ସବୁ ବିଭାଗଗୁଡ଼ିକ ମଧ୍ୟରୁ ଜଳ ସମ୍ପଦ ବିଭାଗ ସର୍ବାଧିକ ବ୍ୟୟ କରୁଛି । ତାହାର ସିଧାସଳଖ ଲାଭ ଚାଷୀମାନେ ପାଉଛନ୍ତି । ସୁଯୋଗର ସଦୁପଯୋଗ କରି ବିବିଧ ଫସଲ, ଲାଭକାରୀ ଫସଲ ଚାଷ କରିବା ଏବଂ ଲଘୁ ଉଦ୍ୟୋଗ ଗଠନ କରି ନିଜର ଆୟ ବଢ଼ାଇବା ଲାଗି ଉଦ୍ୟମ କରିବାକୁ ବକ୍ତମାନେ ଚାଷୀ ବର୍ଗଙ୍କୁ ପରାମର୍ଶ ଦେଇଛନ୍ତି । ଦକ୍ଷତା ବିକାଶ ସମ୍ପର୍କିତ ଅଧିବେଶନରେ ଶିଳ୍ପ ଓ ଶିକ୍ଷାନୁଷ୍ଠାନ ଭିତରେ ସହଯୋଗିତା ବଢ଼ାଇ ଅଧିକ ଦକ୍ଷତ ମାନବ ସମ୍ବଳ ବିକାଶ ଉପରେ ଗୁରୁତ୍ୱାରୋପ କରାଯାଇଥିଲା । ମିଶନ ଶକ୍ତି ଓ ମହିଳା ସଶକ୍ତକରଣ ଉପରେ ଅନୁଷ୍ଠିତ ସ୍ୱତନ୍ତ୍ର ଅଧିବେଶନରେ ଦେଶ ଓ ରାଜ୍ୟର ଉନ୍ନତି ପାଇଁ ମହିଳାମାନଙ୍କ ସାମାଜିକ, ଅର୍ଥନୈତିକ ଓ ରାଜନୈତିକ ଉନ୍ନତି ହେବା ଜରୁରୀ ବୋଲି ବକ୍ତାମାନେ ଆଲୋକପାତ କରିଥିଲେ । ଷ୍ଟାର୍ଟଅପ୍ ସମ୍ପର୍କିତ ଅଧିବେଶନରେ ବକ୍ତାମାନେ କହିଥିଲେ ଯେ ଷ୍ଟାର୍ଟଅପ୍ଗୁଡ଼ିକ ପାଇଁ ଦୁଇଟି ଜିନିଷ ବହୁତ ଗୁରୁତ୍ୱପୂର୍ଣ୍ଣ । ଉଦ୍ୟୋଗୀ ଓ ଟ୍ରେଡରମାନଙ୍କୁ ସମ୍ମାନ ଜଣାଇବାକୁ ହେବ ଏବଂ ସଜହ ବ୍ୟବସାୟ ବାତାବରଣ ଉପରେ ଗୁରୁତ୍ୱପୂର୍ଣ୍ଣ । ସେଥିପାଇଁ ସରକାରୀ ସ୍ତରରେ ଓ ସମାଜରେ ଆବଶ୍ୟକ ପରିବର୍ତନ ଆବଶ୍ୟକ । ଉଦ୍ୟୋଗୀ ପରିବାର ତୁଳନାରେ ଅଣ ଉଦ୍ୟୋଗୀ ପରିବାରର ଲୋକମାନେ ଉଦ୍ୟୋଗ ଗଠନ କରିବାକୁ ଆଗେଇ ଆସୁଛନ୍ତି । ଉଦ୍ୟୋଗୀ ପରିବାର ମଧ୍ୟ ବ୍ୟବସାୟ କ୍ଷେତ୍ରରେ ରହିବାର ଆବଶ୍ୟକତା ରହିଛି । ଓଡ଼ିଶାକୁ ଷ୍ଟାର୍ଟଅପ୍ କ୍ଷେତ୍ରରେ ଅଗ୍ରଣୀ ରଖିବା ଲାଗି ସମୟ ଅନୁସାରେ ନିୟମରେ ଦରକାର ହେଉଥିବା ପରିବର୍ତନ ଆଣିବାକୁ ସରକାର ପ୍ରତିବଦ୍ଧ ରହିଛନ୍ତି । ଏହି ଅଧିବେଶନରେ ଶିଳ୍ପ ବିଭାଗର ପ୍ରମୁଖ ସଚିବ ହେମନ୍ତ ଶର୍ମା, ଷ୍ଟାର୍ଟଅପ୍ ଓଡ଼ିଶା କାର୍ଯ୍ୟନିର୍ବାହୀ ଅଧ୍ୟକ୍ଷ ଡକ୍ଟର ଓମ୍କାର୍ ରାଏ, ଆଇଆଇଏମ୍ ସମ୍ବଲପୁର ନିର୍ଦ୍ଦେଶକ ମହାଦେଓ ଜୟସ୍ୱାଲ, ୟଙ୍ଗ ଇଣ୍ଡିଆର ବିଶାଳ କୁମାର ଅଗ୍ରୱାଲା, ୱାଇଆଇର ପୂର୍ବତନ ଅଧ୍ୟକ୍ଷ ଅବନିଶ ନାୟକ, ସିଆଇଆଇ ୟଙ୍ଗ ଇଣ୍ଡିଆନସ, ଭୁବନେଶ୍ୱରର ଅଧକ୍ଷା, ସୋନାଲ ଏନ ମୋରେ, ପିଡବ୍ଲୁସିର ପାର୍ଟନର ଆଶୁତୋଷ ଚାନ୍ଦ ଓ ଝାରସୁଗୁଡ଼ାର ଏସପିି ପର୍ଶୋତମ ଦାସ ଉପସ୍ଥିତ ଥିଲେ ।
