ଭୁବନେଶ୍ବର, ଅକ୍ଟୋବର ୧୧ (ପ୍ରତ୍ୟୁଷା ବ୍ୟୁରୋ)– ଭୁବନେଶ୍ବର କଳିଙ୍ଗ ଷ୍ଟାଡ଼ିୟମରେ ମଙ୍ଗଳବାର ସଂଧ୍ୟାରେ ଅନୁଷ୍ଠିତ ଫିଫା ୧୭ ବର୍ଷରୁ କମ୍ ମହିଳା ବିଶ୍ୱକପର ମ୍ୟାଚକୁ ଉପଭୋଗ କରିଛନ୍ତି କେନ୍ଦ୍ର ଶିକ୍ଷା, ଦକ୍ଷତା ବିକାଶ ଏବଂ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଭାରତ ଓ ଆମେରିକା ମଧ୍ୟରେ ଆୟୋଜିତ ଫୁଟବଲ ମ୍ୟାଚକୁ ଶ୍ରୀ ପ୍ରଧାନ ଉପଭୋଗ କରିଥିଲେ । ସେ କହିଛନ୍ତି ଓଡ଼ିଶା, ଗୋଆ ଏବଂ ମହାରାଷ୍ଟ୍ରରେ ଫିଫା ଏବଂ ସର୍ବଭାରତୀୟ ଫୁଟବଲ ମହାସଂଘ(ଏଆଇଏଫଏଫ) ସହଯୋଗରେ ଏହି ବିଶ୍ବକପ ଅନୁଷ୍ଠିତ ହୋଇଯାଇଛି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ଵରେ ଦେଶରେ କ୍ରୀଡ଼ାକୁ ଗୁରୁତ୍ବ ଦିଆଯାଉଛି । ଆଜି ଦେଶରେ କ୍ରୀଡ଼ାର ବାତାବରଣ ବଦଳିଛି । ଆଜି ଭୁବନେଶ୍ବରରେ ଆୟୋଜିତ ମ୍ୟାଚରେ କେନ୍ଦ୍ର କ୍ରୀଡ଼ା ଓ ଯୁବ ବ୍ୟାପାର ମନ୍ତ୍ରୀ ଅନୁରାଗ ଠାକୁର, କେନ୍ଦ୍ର ଆଇନ ଓ ନ୍ୟାୟ ମନ୍ତ୍ରୀ କିରେନ ରିଜିଜୁ, କ୍ରୀଡ଼ା ଓ ଯୁବ ବ୍ୟାପାର ରାଷ୍ଟ୍ରମନ୍ତ୍ରୀ ନିଶିଥ ପାରମାଣିକ, ଫିଫାର ମହାସଚିବ ଫାତମା ସମୌରା, ଏଆଇଏଫଏଫର ସଭାପତି କୌଲ୍ୟାଣ ଚୌବେଙ୍କ ଉପସ୍ଥିତି ଦ୍ବାରା ଫୁଟବଲ୍ କ୍ରୀଡାର ମହତ୍ତ୍ବ ବଢ଼ିଛି । ଉଭୟ ଦଳର ଖେଳାଳୀ ମାନଙ୍କର ଉଚ୍ଚ ମାନର କ୍ରୀଡ଼ା ପ୍ରଦର୍ଶନକୁ ଶ୍ରୀ ପ୍ରଧାନ ପ୍ରଶଂସା କରିଛନ୍ତି । ସେହିପରି ଭାରତର ଖେଳାଳୀ ମାନଙ୍କୁ ଆଗାମୀ ଦିନ ମାନଙ୍କରେ ହେବାକୁ ଥିବା ମ୍ୟାଚ୍ ପାଇଁ ସେ ଶୁଭେଚ୍ଛା ଜଣାଇଛନ୍ତି ।
